D'r Büttel Bobby - scharf im Visier seiner Drohna. Fotos: Geiger
Memmingen (rad). Es ist eine lange Tradition, d'r Memminger Büttel eröffnet mit seinem Fischerspruch den Fischertag. Bisweilen sarkastisch oder ironisch, aber niemals zynisch. Dafür recht launisch - so auch heuer. Scharf beobachtet von d'r Memminger Drohna
Hier der Fischerspruch 2013:
Daß trotz dene viela Baustella so a Hauffa Leit‘ recht- zeitig do am Marktplatz send – kommt wohl doher, daß se‘ schon seit heit Morga onterwegs send. A bisle enttäuscht bin ih ond Garde aber scho – mir hand eigentlich denkt, daß für ons au so a‘ Rot‘r Teppich, wie er überall romflackat, vom Roathaus bis doher ausg’legt wiard.
S‘ Wichtigste:
D’r Bürgermoischt’r, d‘r Stadtrat ond d’r nuie Vorstand vom Fischertagverein hand einstimmig beschlossa, daß morga, am Samstig den 27. Juli 2013, d’r Fischertag stattfindet !
Begrüßung:
1. Isch dia wichtigste Person, d’r amtierende Fischerkönig Manfred der 1., der Schwaben-
rentner, do ? Zoig dih – no ungefähr 15 Stond derfsch regiera, dann gibt’s an Lochtritt.
2. B‘sonders grüaß ich no onsern Stadtbachfischer ond OB Dr. Ivo Holzinger, sowia alle
Fischer ond Kübelesträger – ohne dia goaht nix !
3. Ond wia jeds Joahr den Ehragardischta Fritz Bochtler mit seiner Gudrun ( Spende ?)
Jetzt des Wichtigste zum morgiga Fischertag:
a) Dia Fischer sammlat sich wia jed‘s Joahr ab ½ Siebene im Hof vo d‘r Realschual –
noach Siebene gibt’s aber koin Stempel meh, au wenn da blärasch !
b) D’r Umzugsweg isch desmol anderscht: s’Westertor rei – Zangmeisterstr.ra – d’
Herrenstr. nom,– in d’Kreuzstr. nei - am Klösterle vorbei zur Schranne – am
Klöschterle isch es sau eng - do müaßat d’Zuschauer aufpassa daß se it verdappat werat.
c) D’r Oberfischer Jürgen Kolb verliest dann an der Schranna sein’ Fischerspruch – erscht
wenn der fe’tig isch, noach dem dritta HÖH - derf jeder an sein Platz am Bach renna.
d) Wer vor dem Böllerschuß om Achte neijuckt, wird von d’r Garde verhaftet, falls se ihn
d’rwischat oder er wiard von d’r Bachaufsicht notiert.
e) Am letzta Fischertag gabs fascht koine Reklamationa wega dem Tierschutz – oin
Fischer hoat ma wega Trunkenheit am Bära aus’m Verei‘ g’schmissa! Fischer
machat weiter so, dann bleibt ons d’r Fischertag sicher erhalta – d‘ Enkel dankats uih !
f) Jeder Fischer hoat ja sein Fischerbriaf erhalta – für dia wo it lesa könnat, jetzt nomal:
Pro Forell’ müessat 7 Liter Wasser im Kübel sei – wia groß d’r Kübel letztendlich isch,
des isch gleich ! Es muaß ja jeder sein Kübel sell traga oder au fahra kenna.
g) D’r Forellapreis isch gleich blieba – 3 € 50 Cent wenn d’Fisch ab gibsch - wer Forella
am Rossmarkt fängt, ka vielleicht handla, dia Forella hättat an Beig’schmack von
Stratitella- ond Vanilleeis – weil viele ihre Eisreschtla do in da Bach nei werfat. Au
soll’s Forella mit Kässpaza - G’schmack geba – wo, verroat ih aber it .
Jetzt zu onserer Großbaustelle Fuaßgängerzone:
Bei ons hoats ja roter Teppich sei müssa, weil’s dem OB sei Lieblingsfarb isch. A‘
grüner Teppich hätt de Bürger oifach a bisle meh Hoffnung g‘macht, wenn se an dia
Fertigstellung vo d’r Fuaßgängerzone denkat.
Am Eingang zur Fußgängerzone fehlat no wichtige Schilder mit dem Hinweis:
a) nur mit Wander- oder Bergschuhen begehbar
b) bei Regen besteht Gummistiefel-Pflicht
c) Wanderstöck‘ für die steile Anstieg‘ zu dene Läda-eingäng sind dringenst zu
empfehlen.
Ich vermiss am Marktplatz und an der Schranne an koschtalosa Schuahputz-
automat.
Dia VHS hätt‘ unbedingt vor Baubeginn Kurse a‘bieta solla: z.B. -
Einkaufa unter alpine Bedingunga - oder für Unternehmer: Überlebenskampf im Dreck.
Warum baut ma im Zuge der Renovierung am Weinmarkt eigentlich koi‘ FUSSGÄNGER- UNTERFÜHRUNG ? oder so an Steg wia in der Kalchstroaß plant isch ? Dann wär alles kreuzungsfrei ond die arme Autofahrer müßtat it immer a‘heba.
Dia Garde dät beim Bau ja helfa, aber dia hat scho a andere wichtige Aufgabe übernomma – d’r Hauptmann erklärt des noachher no näher.
Den rota Teppich muaß ma am Schluß aber rechtzeitig ei‘rolla ond reiniga. Der saubere Teppich muaß dann in der fertiga Fußgängerzone nui verlegt wera, damit der Belag lang sche bleibt und koine Flecken kriagt.
D’r Stadtrat sott’ sich aber rechtzeitig d‘rmit beschäftiga, welche Strofa die Kaugummi-Ausspucker kriagat. A hohe Geldstroaf ond d’rzua no auf de Knui den Dreck meh wegscherra – ond vielleicht au no a koschtaloses Bildle in d’r MZ – des dät gega dia
Umweltsaua sicher helfa.
Memminga hoat jetzt a 8tes Wahrzoicha – dia Brandruine an d’r Schranna - des isch a nuis Hobby für Gäscht – Brandruina gucka – a paar zusätzliche Bänkla dätat do it schada. Des Viertel do am Schrannaplatz isch scho a b’sonders hoißes Revier!
D’r Christo – der Verhüllungskünstler – hoat a’g’rufa, ob er an d’r Schranna des Dreckloch it verkloida derf - ma hoat des aber ab’g‘lehnt – weil ma dann ja des nuie Wahrzoicha nomma sieht.
Wenn mer scho beim Dreck send :
Ob ma an dene Müllcontainer Kameras aufstella derf oder it – ih verstand des ganze Theater it – Polizei fragt doch au it vorher ob se mih fotografieren derf wenn ih an Mist bau‘– ma muß halt lediglich auf a‘ Plakat schreiba, wo der nächste it überwachte Container stoaht – ich wüsste schon ein paar Adressen in Württemberg diba.
d' Memminger Drohna
Wenn oiner trotzdem erwischt wird, sott er als Stroaf am Wochenende an dene Container a Mahnwache halta ond nebazua saubermacha - des wäre für die Dreckbära wohl die richtige Stroaf‘.
Zom Überwacha gibt’s do ganz ja nuie Erfindunga – z.B. Drohna – des wär doch sinnvoll wenn sich Memminga jetzt so a Stadtdrohne zulega dät – dia gibt’s in Berlin grad ganz billig. Muster vorzeigen!
Außer dene Müllcontainer könnt ma ja no viel meh überwacha:
a) z.B. Schwa‘zfischer am Stadtbach dät ma d‘rwischa
b) Kaugummiausspucker in d’r Fuaßgängerzone
c) Stauunga am Weinmarkt kämat schneller im Radio
d) Überwacha vo Steuersünder – wer vergrabt grad was in sei’m Gata
e) nachts könnt ma dia Eckabrunzer verschrecka
f) s’Rathaus könnt ma kontrolliera, ob d’r OB in sei’m Büro isch ond ob er was schafft
g) ond vor allem dia Grenzüberwachung noach Württaberg nom wär dann au perfekt
Dia A’schaffung dät sich auf jeden Fall lohna – oder it ?
Es gibt aber au scho Einmaldrohnen – ich hau do zwoi Muschter d’rbei:
Mit dene ka’sch gucka ob d’Nachbarin wieder ohne Bikini im Gata flackat oder was d’r Nachbar auf sei’m Grill hoat. (Loaß mol fliega.)
Wenn d’r Ausbau vom Allgäu Airport klappt, könnt ma die Drohne ja do doba stationiera -
falls it glei jemand d’rgega klagt.
Des Stadtbad vo‘ Memminga isch zwar it des Schönste, aber d’rfür des Benutzer- freundlichste Bad. Bei dem Sauwetter neulich, wo in Bayern alle Bäder zua g’sperrt hand, hoat Memminga offa g’het – oi‘ Gardist isch ins Bad naus ganga, weil oimol in d’r Woch‘ muaß der sich ja au wäscha – er war d’r oinzigste Gascht - er isch do persönlich begrüaßt wora vom Bademeister, vo dera Kassierin (dia hoat er erscht wecka müssa), Putzfrau hoat ihm beim Aus- und A’zieah g’holfa und d’r Wasserwachtler hoat ihm da Buckel g’wäscha – dia ei‘genommene 1,30€ hoat ma auf d’Sparkass‘ füars nuie Bad ei’zahlt. Des hoat sich romg’sprocha – am nächsta Tag send sogar zwoi Auswärtige zom Bada komma. Des brengt „Kohle“.
Noach dem Fischertag soll am Roßmarkt des große MM wieder in da Bach nei komma.
Laut MZ soll sich des Deng dann viel schneller bewega wia vorher, a‘passt an dia schnelle Entwicklung in Memminga. Ih glaub aber it, daß dia Fuaßgängerzone deswega schneller fe’tig wiard.
Ich dät au empfehla, daß ma onsere Freind dia Tierschützer froagt, ob des dene Forella was ausmacht. It daß de‘ Fisch schwindlig wiard ond alle em Krois rom schwemmat. A Königsforell wird ma an dem Platz dia nächste Joahr wohl nomma fanga – oder was moinsch Herr Noch-Fischerkenig.
Im Stadtrat kümmerat sich ja endlich a paar om‘s Brunzproblem im Städtle – „Nette Toiletten“ hoißt dia Aktion. Ich fend des guat! Drei Hinweisschildla hau ih au scho d’rbei. Garde wiard dia heit no installiera!
Mei Vorschlag wo ma dia Schildla na macht:
1. Oins beim Eiskeller am Kempter Tor, do funktionierat dia Toiletta ja no, au wenn des Lokal zu isch. Des hoat ma ja wega uneinsichtiger Nachtschwärmer g’schlossa.
2. Oi Schild ans Rathaus, do hand mir sehr schöne Clo’s,
3. ond des Dritte bei d’r Polizei, do isch immer jemand do.
Privatpersona könnat sich au bewerbe. Vor allem für Single wär des a guate Möglichkeit zum Kontakta.
Wer am Jahresende dia beschte „Kundenbewertung“ kriagt, dem wird im Rahma der Vergabe vom Fasadenpreise a „Goldener Clodeckel verlieha.
Wo bleibt d’r Brunnen am Weinmarkt ? Isch der Künstler immer no krank oder isch dem s‘Material ausgegangen – bei der Größe könnt des ja sei !
Übergangsmäßig könnt ma doch den Brunna am Theaterplatz wieder aktivieren, der dät jetzt doch guat na passa – dia Überwachung könnt dia nui Drohne übernemma.
Dia Garde hoat noach dem Fischertagsstress an Ausflug nach Mallorca buacht – jetzt fehlt blos no des Geld vom letztjähriga Fassadapreis – vielleicht hoat d’r OB dia Kontonummer verlegt.
So, wer jetzt it all’s verstanda hoat, ka om Siebene ja an da Schrannaplatz komma ond nomal zuhorcha.
Ich wünsch ui alle an schöna Fischertag
Memminga den 26. Juli anno 2013 - Uir Büttel Bobby