Memmingen (mg/rad). D'r Memminger Stadtbüttel ruft den Fischertag aus, des is alte Tradition in der Maustadt. Wie immer hintergründig, manchmal au a bissel bös'. Heuer vor einem rappelvollen Marktplatz mit Extra-Worten für den "Neuen" - für Oberbürgermeister Jan Rothenbacher, nachdem der alte OB "ausgeschildert" worden ist - so dr Bütt'l.
Zuvor - eigentlich wie immer - gab’s noch die formellen Dinge zu besprechen, wie etwa, wann’s genau losgeht und wo der Fischerzug verläuft.
Die Red' vom Bütt'l:
Liabe Leit, liabe Gäschd horchat zua!
Bürgermoischter ond Raut der freia Reichsstadt Memmingen hot bschlossa, dass Morga am 22. Juli 2023, der Memminger Fischertag – so wia letzschd Joahr au – stattfended!
Dr Fischerzug goht morga meh om viertel noch Siemne vom alta Impfzentrum (zur Zweit isch es dia Edith-Stoi-Schual) zum Schrannaplatz! - ond au der Oberfischer schwätzt sein Fischerspruch om dia Zeit!
Es ischd grundsätzlich verbota vorm Fischerspruch mit seim Bära an da Stadtbach nahz´hockad!
Wenn um 8te da Böller kracht derfet alle Fischenden in da Stadtbach neijucka!
Ma hot da Forella- und Forellinnenpreis fiar da Samstig erstmals in meiner ganzen Amtszeit auf 4.000 Euro pro Tonne festgelegt!
(Dia Schlaue onder eich kennat ja jetzt im Kopf ausrechna, was a Kilo koschd! Da Hauptma frog mer liabr id!)
Der wo abr meh verlangt, wird am Marktplatz von den Memminger Scharfrichtenden
an d´ Ohra aufghängt!
Memminga, 21. Juli dreiazwanzg
Dr Oberbürgermoischder
So, liabe Leit: Nochdem am 21. März a nuie KI im Rathaus installiert wurde, - es wurde ja vorher alz „ausgeschildert“ - muaß i noh a paar Tipps mit dem Umgang drmit bekannt geba:
Dia KI nennt sich „nuir Oberbürgermoischdr“ ond hoißt bekanntlich Jan Rothenbacher – Jan isch dia Kurzform von „Johannes“ – basst also guat zu seiner Körper-Größe….!
Ond „Rot“ wia sei Partei! Wenn er in dr andra Partei wär, dann dät er ja Schwarzbacher oder noh schlemmer: „Schwarzfischer“ hoißa! Des goht in Memminga gar id°
Er kommt aus dem württembergischen Balzheim und mag am liabschta Balzheimer ond Balzheimerinnen! Des send ganz guate gegenderte Wieschd! Am liabsta mit Senf und Senfinnen!
Manche sagat au: Er dät aber gera au a Müsli essa! Damit dr KI gsond bleibt!! Ihr wissat scho: Des Müsli vom Rothenbacher! Mei do bisch a Kerle….Des empfiehlt er alle Memmingenden! Ond wenns Müsli id hilft, dann nemmsch an Löffel voll Hanföl - au vom Rothenbacher! A Hanföl! Dann wirsch richtig schlau! Said er….
(Zukünftig geits deshalb oin Löffel Hanföl für jeden Stadtratenden vor jeder Sitzung! ….Bei manche Stadträt wäret aber au zwoi Löffel ganz guat! Moin I….)
Dr KI hot übrigens au gsait, dass man – sobald des Bundes-Gsetz vo de Sozis ganz fetig isch, - vor dr Sitzung gemeinsam a bissle Canabis raucha derf! (Do freit sich der Gsondheits-Minischter Holycheck au scho drauf!)
Wichtig isch beim Umgang mit dem nuia KI au noh folgendes:
Weil er noh so jung isch, isch er noh a bissle zurückhaltend! Aber: er hott ja da Papa Hans-Martin ond Mama Bavaria Gretl an seiner Seite. Dia wered em dann scho saga, wo der Bartel da Moschd hollat.
Mitanand send se übrigens durchschnittlich 59 Joahr alt! Also au nomma so jong….
Übern OB seiner Verwaltung sag I nix! Dia send eh id do, weil se grad , in Buxach, in Volkratshofa, in Stoihoi, in Dickenreishausa ond in Aumadenga nuie Ortsschilder montiered! Bi gspannt, wo I heut Obend wohn! Hoffentlich fend I noh hoim ins ehemalige Buxach!
So, jetzt wissat dr fast alles zum Nuia Memminger KI!
Ah! Dr Fischertagsverein hot übriogens au an nuie KI! Die hoißt nomma Michael Ruprecht sondern Thorsten Burgberg oder so! Dr KI vom Verein hott z. B. gleich feschdglegt, das des Fischertagsabzeichen huir a schwarzes Rathaus zoigt! I glaub, des hot bestimmt koi Bedeutung! Oder? Was moinsch Du Burgberg!?
So, jetzt roichts mit meim Gschwätz fiar huir!! Abschließend möchte i mi ganz herzlich bedanka! Zuerst bei mir selber! Und selbstverständlich bei ui alle, dass er mer so lang zughorcht hand!
An schena Fischertag wünsch I!
Uir Büttel!
Hauptmann:
Du Büttel, was hosch eigentlich dia ganz Zeit mit dem saudomma KI??????
