Memmingen (mg). Es ist ja eine alte Tradition, das Ausrufen des Fischerspruches. Natürlich auch heuer wieder - und auch diesmal wieder originell von Büttel Bobby am Schrannenplatz bei Kaiserwetter unter's Volk gebracht:
Endlich isch der Sauhauffa komplett – jetzt ka ich au mol was wichtiges saga:
1. D’r Bürgermoischter ond d’r Stadtrat hand einstimmig beschlossa, dass morga,
am Samstig den 28.Juli 2012, der Fischertag stattfindet.
Isch dia wichtigste Person, der amtierende Fischerkönig Thomas III, der
Hundertste do? Komm her, du bisch dia wichtigste Person, mir stellat dih
nommal vor – morga fruah isch rom !!
B´sonders begrüß ih no unsern Stadtbachfischer ond OB Ivo Holzinger
ònd dia Vorstandschaft vom Fischertagsverein – ohne dia ging ja nix !
Ih soll au den Ehragardischta Fritz Bochtler ond sei Gudrun grüaßa – er hoat
scho meh g’spendat
2. Jetzt des Wichtigste zum morgiga Fischertag:
Dia Fischer sammlat sich wia jed‘s Joahr ab ½ Siebene im Hof von d’r
Realschul. Noach Siebene gibt’s koi Fischerka´t meh – au wenn blärasch. Der
Fischerzug goaht durchs Westertor rei, Zangmoischterstroaß na, ond jetzt alle
aufpassa – au d`Zuschauer – in d`Herrastroaß nomm, übern Roßmarkt,
d`Kreuzstoaß na bis zur Fußgängerzone ond rechts nomm zur Schranna. Wenn
woanderst na stoasch, hosch an hauffa Platz, siehsch aber nix.
Auf`m Fass an d`r Schranna verliest d’r Oberfischer Jürgen Kolb dann zum 10.
mol sein` Fischerspruch! Erscht wenn der fertig isch, dürfat alle Fischer an da
Bach renna. Aber aufpassa, es gilt überall Tempo 30 ond rechts vor links.
Zuwiderhandlunga werat von der Stadtgarde eventuell geahndet.
Vor dem Böllerschuß hoat koiner was im Bach verlora. Wer vorher neijuckt –
der wird vo d’r Garde ei’g’sperrt – falls se ihn d’rwischt - als Stroaf muaß er
nächstes Joahr vor am Umzug dann dia Schuah von mir ond d`r Garde putza.
Im letzta Joahr hoats fascht koine Beanstandunga geba – Fischer machat weiter
so! Nemmat gnua Kübel mit – vor allem dia Profitfischer – dond gnua Bach-
wasser nei - für jeda Forell‘ sieba Liter ond gand au in dia Versorgungszelte falls
ihr was g’fanga hand - dann kennat au desmol onsere Freind, dia Animaler, nix
beanstanda. D’r OB braucht wahrscheinlich koin Kübel, den ka‘ er bei Ebay ver-
steigera, mit dem Erlös ka ma dann s`Dach vom Hallabad saniera.
D’r Forellapreis fürs Kilo isch gleiche wia letztes Joahr – s`gibt 3 € 50 Cent,
wenn ma seine Fisch abgibt. Für`n OB könnt ma ja nochher no sammla, damit er
beim Frühschopa au ebbas trenka ka.
Der Früahschoppa ond des restliche Programm bleibat gleich. Au der Omzug am
Samstig Obad goaht normal über`n Gerberplatz, es sei koi Gefahr meh aus dene
Gullis zom erwarta.Wenn oiner noach dem Umzug s`Kopfweh hoat, dann
kommt des wahrscheinlich vom sauffa. Der Fischerobad fendat wega dene
Wallastoispiele am Obad in der Stadthalle statt,
Dia Heimatstunde am Sonntig fällt aus, aber es gibt ja d`rfür am Sonntig om
10.30 Uhr a Matineevorstellung auf`m Marktplatz.
3. Im letzta Joahr hoat sich ja wieder viel do im Städtle:
Onser Wirtschaftförderin Frau Platschka isch wieder ganga – ich hau g`hört
dia war sehr fleißig – dia hoat es in drei Joahr g`schafft, das jetzt zwoi nuie
Wirtschafta aufmachat – erschtens des Lamm in d`r Maxi – warum des jetzt an
nuia Name hoat verstoht koi Sau - ond zwoitens dia Brauereigaststätte am
Schweizerberg. Wenn ma der Garde ond mir ebbas ausgibt, dann dät ih au
saga wia dia am Schweizerberg doba hoißt. Isch jemand vom Barfüaßer do?
It? Dann sag is au it.
Allerdings beinhaltet des Objekt am Schweizerberg au a kulturelles Drama
fürs Allgäu - jetzt ka ma koin Kluftinger Film meh dreha, weil der Kaschta ja zu
ma Hotel umbaut wora isch. Aber vielleicht schreibat d`r Klüpfl ond d`r Kober an
nuia Krimi, den ma im Rathaus dreha könnt. Do hät ma au glei gnua Statista.
Mitta nei ins Sommerloch kommt dia Nachricht – das d`r Steg in d’r
Kalchstroass wieder aktuell wird. Do isch d`r Stadtrat im Herbst it zum beneida.
Aber ma könnt ja mol überlega, ob ma dene Gäscht vom Ross it an Sänftadienst
über d`Stroaß anbieta könnt. Wenns regnat, geschlossene Sänfta ond wenn‘s sche
isch offene Sänfta mit Blick auf Kreuzherrn- und Martinskirch. Aber qualifizierte
Sänftaträger send momentan als Leiharbeiter rar am Arbeitsmarkt.
7 – Dächer Genossenschaft isch jetzt 100 Joahr alt wora. Dia hand viel bewegt
im Städtle. D´r Apotheker im 7-Dächer Haus wollt zum Jubiläum an b`sondera
Geburtstagscocktail mixa – do isch dann aber ebbas schieaf g`laufa, weil irgend
jemand scheinbar des Rezept vertauscht hoat. Do warat dann soviel Einsatzkräft
vor Ort, ich hau scho g`moint da hoat a Bomb eing`schlaga. Aber inzwischa send
alle meh g`sond vom Sonderurlaub z`ruck.
Am Marktplatz sott ma heit Obad beim Feschta aber aufpassa, dass koi Bier in
dia Kanalisation lauft, sonsacht müassat bei Not wega aufsteigende Dämpf‘ -
Stadtratssitzunga ausfalla ond s`Rathaus muaß g`schlossa wera.
Noachdem in MM dia Biotonna im Sommer blos alle 14 Tag g`leert werat,
entstandat do b`sondere G`schmäckla, den Deckel derf ma au it aufmacha,
sonscht krabblat so nette Viechla aus dera Tonne. Do sott ma vielleicht mol an
Ausschuß zur regelmäßiga G´schacksüberprüfung bilda, it daß ganze Stroaßazüg
no krank werat.
Tempo 30 ond rechts vor links send ja grad a wichtige Thema. Für Rollatoren
isch des Problem lösbar, do kam a jetzt Tempomata einbaua lau. Für Radler isch
des am Weinmarkt au koi Problem, da kasch sowieso blos so langsam fahra daß
fascht omfällsch. Aber noachdem jetzt wieder a paar Verkehrsgutachta erstellt
werat, wird’s dia nächste Joahr sicher a Lösung geba.
Garde mit Einlage über : „rechts vor links –„
In d`r Fuaßgängerzone rührt sich jetzt au was. Do ka` ma ab Oktober 2014
stolperfrei spaziera gau, stoht in der MZ. Ih bin g`spannt ob des klappt, oder ob
dia Fertigstellung mit der Einweihung vom nuia Bad zamma fällt.
In der MZ konnt ma au lesa, daß es in Mindelhoim jetzt weniger Kräha gibt –
mih dät scho interessiera wia se dia noach Memminga broacht hand.
Viel Aufregung gibt’s wega dene nuie Abwassergebühra. Jeder zahlt meh ond
koiner woiß so richtig warum. Vielleicht hätt ma do die PIRATA-Partei froga
solla, wia ma so wichtige Änderunga für dia Bürger transparent macha könnt.
Dia Kübelesträger müssat morga au aufpassa! Ja koi Wasser in Kanal leera,
des koscht pro Kübel 3.-€ - Es send städtische AKP`s unterwegs – des send
Abwasser – Kontroll – Persona – dia aufpassat.
Dia Garde bietet jetzt au an Sonderservice a: Wenns zom regna kommt,
ruafsch oifach a, dann kommat dia Gardischta mit Kübel ( Muschter zeigen )
fangat des Regawasser auf ond tragats noach Württaberg nomm. Pro Kübel koscht
das 1 Weiza. Daueraufträg send billiger. Damit Eisaburg ond Volkratshofa au a
emails schicka kennat – a ½ Stond bevors a`fangt zom Regna – hand mir a Stuck
Breitbandkabel d`rbei. Des wird noachher am Schrannaplatz versteigert.
D`r Rolf Spitz kandidiert ja wieder für den Bundestag – des isch fürs Städtle ja
it schlecht – sei´ Erfolgsquote könnt er desmol vielleicht verbessera, wenn er sich
a bisle verkleida dät – oifach so a Augabinde a`ziah ( Muschter zeiga) – meh
wissa wia jetzt braucht er au it, blos des Wort „Transparenz“ muasch er fehlerfrei
also dialektfrei saga könna. Am Flugplatz doba gibt’s jetzt meh Flüge noach
Berlin, damit au Provinzler rechtzeitig zu de Sitzunga kommat. D`r Spitz hoat
angeblich scho a Abbo buacht, hoffentlich hoat er koi Flugangst.
Jeder schwätzt momentan vo dene Pirata. Im Städtle sollat se ja scho an
Stammtisch hau. Vielleicht beginnt jetzt dia Unterwanderung im Stadtrat. A paar
wollat do ja scho öfters ebbas TRANSPARENTER seha wia dia Andere. Aber ih
glaub, daß onser OB – als „ROTER CORSAR“ im Rathaus dia im Griff hoat.
Onser Landesvater Horst Seehofer wäre leichter zum Fischertagsfrühschoppa
komma, als auf sei Facebook-Party, bei ons isch nämlich meh los. Aber immerhin
isch er jetzt ja Schirmherr vom Wallastoi. Neulich war unser Ministerpräsident in
der Zeitung als Schäfer zum seha – vielleicht könnt ma ihn überreda daß er sich
am Fischertag ond Wallostoi als Nachtwächter ehraamtlich nützlich macht.
![Büttel1](/media/original_images/2012/07/Büttel1-223x300.jpg)
Arbeit getan und die Rede leger in der Uniform - Büttel Bobby auch beim Fischerspruch 2012 gewohnt locker. Fotos: Geiger
So des wär wieder s` Wichtigste. Om Siebene ruafat mir für alle dia sich nix merka könnat, nomal am Schrannaplatz aus.
Ih wünsch uih jetzt alle an schöna Fischertag und a trockene und unfallfreie Wallastoiwoche.
Memminga am 27.Juli anno 2012
Uir Büttel Bobby