Memmingen (mg/rad). Es ist altbewährte Tradition, dass d'r Memminger Stadtbüttel den Fischertag 'ausgruft'. Immer recht süffisant, diesmal mit neuem Schuhwerk - ganz nach "neuer Sitte" im Rathaus.
Zuvor - eigentlich wie jedes Jahr - gab’s noch die formellen Dinge zu besprechen. Wann genau geht's los und wo der Fischerzug verläuft. Wegen der vielen Baustellen könnte es aber ein wenig verzwickt werden.
Ach ja, d'r Hauptmann wollte vorab vom Büttel noch was über sein neues "Geläuf" wissen:
"Du Büttel, was hosch Du eigentlich heit fiar Schuah a! Läuft ma so gschlampet als städtischer Agstellter rom?"
D'r Büttel sei Antwort: "Warum? Des entspricht akurat dr nuia Personal-Schuah- ond Kloider Verordnung! Erzähl drs glei…."
Aber dann ging's los:
Liabe Leit, liabe Gäschd horchat zua!
Bürgermoischter ond Raut der freia Reichsstadt Memmingen hot bschlossa, dass Morga am 20. Juli 2024 der Memminger Fischertag stattfended!
Der Fischerzug, goht morga meh om viertel noch Siemne vom alta Impfzentrum (des isch zur Zeit immer noh dia Edith-Stoi-Schual) zum Schrannaplatz! -Weaga de viele Baustelle, goht dr Zug kreuz und quer durchs Städle! So genau ka ma´s im Moment noh gar id saga! Dr Vereins-Präsident, Thorsten Burgberg ond dr OB gand abr voraus; dann wird ma scho irgendwann zom Schrannaplatz komma! Moint ma!
Ond au der Oberfischer schwätzt sein Fischerspruch om dia Zeit!
(Dr Oberfischer hot übrigens morga noh Geburtsdag! Er wünscht sich nix liaber als a Faß zom Naufstanda! Wer oins hot, brengts morga friah mit! Noh geits a Freibier vo ehm!)
Es ischd grundsätzlich verbota vorm Fischerspruch mit seim Bära an da Stadtbach nahz´hockad!
Wenn um achte da Böller kracht derfet alle Fischer ond au dia vier oder fünf Fischerinnen in da Stadtbach neijucka!
Ma hot da Forella- und Forellinnenpreis fiar da Samstig meh auf vier Euro pro Kilo feschdglegt!
Der wo abr meh verlangt, wird am Marktplatz von den Memminger Scharfrichter/innen
an d´ Ohra aufghängt!
Memminga, 19. Juli vierazwanzg
Dr Oberbürgermoischder
i.A. dr Büttel
So, liabe Leit: Nochdem dr kloine Jan (Abgekürzt KI) scho übr a ganz Joahr an der Macht isch,- soll I vo eahm noch fünf nuie Vorschrifta bekannt geaba:
Er hott zua mir gsait, dass es besser isch, wenn I d ´Bevölkerung scho mol informier´, dann braucht er nomma so viel drzua saga – ond noh kennat Leit über d Büttel goscha ond id über ehn!
Zerschd soll i aber nohmol an alle „Blauliachter“ a herzlichs Vergelts-Gott ausrichta! Wia am erschda Juni die Hochwasserwelle durch Memminga gschwabt isch, hand alle sauguat zammagholfa! Des war einmalig ond verdient höchschdes Lob!!!!(Eigentlich wollt er ja a Frei-Bier braua lau, aber des Memminger Wasser war zwischazeitlich a weng verdrialat ond außerdem geits koi Brauerei meh!) Hand dia Blauliachter halt doch Pech ghett….
So jetzt gohts aber los!
Erstens:
Hauptmann pass auf!
Ab dem erschten Auguscht an gilt die allgemeine Turnschuah- ond Fußkloidr Verordnung ! Auf allen öffentlichen Plätzen und Gebäuden. Es ischd verbota, mit normale Leaderschuah ins Rathaus zom komma oder über da Marktplatz zom Latscha. Es drohen empfindliche Strafen. Ganz schlimm wird ma bestraft, wenn ma oder Frau mit dünne Absätz umannader schlorget. Weil mit dünne, hohe Absätz werad dia Fraua oft größer als der OB selber. Des will er id! Außerdem hott er bei Amazone erscht zeha nuie Paar Schnieger-Turnschuah ond nuie Hosa bstellt, alles von der neuen Styl-Typ-Marke: „wageidbadschaufen“
(Ist abgekürzt und hoißt =war gerade in der Badewanne und schau noch bisschen fern)
Zwoitens:
Dia Kräha regat d KI ziemlich auf!
Er moint, dass man do Gegenmaßnahmen ergreifen muss. Dia verscheißat nämlich allz! Er moint, ma sott gleiches mit gleichem vergelten!
Ma suacht jetzt Freiwillige fiar dia Gegenmaßnahme! Meldungen bitte ab Montag ins Rathaus! (I glaub allat, des isch a Sch….-Idee….)
Wenn des id klappt, dann dät dr KI dia Musikanten aus der Stadtkapelle abzieha ond regelmäßig onder de Näschter spiela lau! Des soll laut Zeitong helfa ond stinkt id so!
Drittens:
Zur Linderung der städtischen Finanznot greift der KI nun zu Sofortmaßnahmen!
Ab sofort gibt es emmer am Freitag eine Kaffeefahrt fiar alle Memminger Bürgerinnen und Bürger. Quasi als Pflichtveranstaltung! Ma fängt nägschda Freitig in Stoihoi a – om Achte fährt dr Bus Richtung Dickenreis. Dort wird grad ein Heizdecken-Informationszentrum gebaut. Dr KI wird dann dia Verkaufsveranstaltung vor Ort selbr leita. Pro Familie rechnet er mindeschtens mit einer Provision von 100,-- €iro - so kommt bald a großer Batza Geld zamm. Dr Kämmerer freit sich au scho!
Hinweis: Da Kaffee sott ma selber mitbrenga, sonst hott ma koin ond fiar da Bus 5 Euro!
Außerdem plant der OB eine Städtische Hanfpflanzung:
Pro Bürger send drei Pflanza ja erlaubt, dann ka ma do dussa guat 100.000 Hanfpflänzla na do. Der städtische Forst tuats hegen und pflegen ond anschließend online vermarkten! Der Stadtrat macht dann au koine große Ausflüg meh, sondern goht oimal im Joahr zom Probiera naus. Gell , Holitschek, do freisch di scho?
Wo isch eigentlich der Stadtgardist Kaba??
Viertens:
Dass der hoilige Geischd oft als Täuble auftritt, woiß a jeds Kend! Der OB will deshalb, dass ma auf onsere Täubla guat aufpasst ond hot a Dauba-Hotel im Kempter Tor genehmigt! Bed and Breakfast sozusagen. All inclusiv!
So hofft der OB auf weniger Tauba in der Stadt ond mehr Geischd – vor allem bei de Stadträt!
Fünftens:
Gegen den Klimawandel muaß ma dringend ebes do! Dia Menschheit isch ganz alloi schuld dra! Er sait:
A großer Feahler war, dass ma früher de Kender beibrocht hott, alz auf zom easa, damit des Wetter schee wird.
Ond zmal hammr den Salat: Jetzt geits viele dicke Kender und so hoiße Sommer, dass mas kaum aushält!
Seine Kender hot er ab sofort des Aufeasa strengstens verboda!! Ab Schulbeginn gilt des für alle Kender in onserm Städle!
So, abr jetzt roichts mit meim Gschwätz fiar huir!! Abschließend möchte i mi ganz herzlich bedanka! Zuerst, wia emmer, bei mir selber! Und selbstverständlich bei ui alle, dass er mer so lang zughorcht hand!
An schena Fischertag wünsch I!
Uir
Büttel!
